Səhiyyə naziri Teymur Musayev və elm və təhsil naziri Emin Əmrullayev Qarabağ Universitetinin Tibb və sağlamlıq elmləri fakültəsinə, eləcə də universitetin klinikasına səfər ediblər.
Elpress.az xəbər verir ki, nazirlər əvvəlcə universitetin fəaliyyəti və inkişaf istiqamətləri ilə tanış olub, daha sonra fakültənin auditoriyalarına, laboratoriyalarına və Simulyasiya Mərkəzinə baxış keçiriblər. Onlara tələbələrin nəzəri və praktiki hazırlığı üçün yaradılan şərait barədə məlumat verilib.Səfər çərçivəsində nümayəndə heyəti Qarabağ Universitetinin Klinikasında da olub. Burada müasir tibbi avadanlıqlar, laboratoriyalar, müxtəlif şöbələr və göstərilən səhiyyə xidmətləri ilə tanışlıq aparılıb. Qonaqlar tələbə yataqxanasına da baş çəkiblər.Rəsmi proqram çərçivəsində nazirlər tələbələr, müəllimlər və klinikanın əməkdaşları ilə görüş keçiriblər. Müzakirələr zamanı tibb təhsilinin inkişafı, səhiyyə sistemində kadr hazırlığı, gənc həkimlərin peşəkar formalaşması və elmi fəaliyyətin genişləndirilməsi məsələləri ətrafında fikir mübadiləsi aparılıb.İnteraktiv formatda təşkil olunan görüşdə iştirakçıların sualları cavablandırılıb, təhsil və səhiyyə sahələrində həyata keçirilən islahatlar barədə ətraflı məlumat verilib. Nazirlər keyfiyyətli tibb təhsilinin və gənclərin peşəkar inkişafının dövlət siyasətinin əsas istiqamətlərindən biri olduğunu vurğulayıblar.Görüşdə Qarabağ Universitetinin region üçün yüksəkixtisaslı tibbi kadrların hazırlanmasındakı rolu, universitet-klinika əməkdaşlığının əhəmiyyəti və Qarabağda müasir təhsil-səhiyyə mühitinin formalaşdırılması istiqamətində görülən işlər də diqqət mərkəzində olub.Tədbir bədii proqramla davam edib, səfər isə xatirə fotosunun çəkilməsi ilə başa çatıb.
