Milli Məclisin komissiya sədri Ramid Namazov bildirib ki, Azərbaycanın strateji coğrafi mövqeyi ölkəni beynəlxalq fiber-optik dəhlizlərin inkişafı üçün əlverişli mərkəzə çevirə bilər.
Elpress.az xəbər verir ki, Ramid Namazov bu fikirləri iyulun 9-da Milli Məclisdə keçirilən “Rəqəmsal inkişaf, süni intellekt və uşaqların sosial şəbəkə platformalarındakı zərərli təsirlərdən qorunması” mövzusunda ictimai müzakirələr zamanı səsləndirib.O bildirib ki, Azərbaycanın Asiya ilə Avropa arasında Şərq–Qərb və Şimal–Cənub nəqliyyat dəhlizlərinin kəsişməsində yerləşməsi ölkədə mövcud nəqliyyat və enerji infrastrukturunun fiber-optik dəhlizlərə çevrilməsi üçün mühüm imkanlar yaradır. Deputatın sözlərinə görə, bu üstünlük Azərbaycanın regional rəqəmsal bağlantı mərkəzi kimi mövqeyini daha da gücləndirə bilər.Ramid Namazov qeyd edib ki, son 20 ildə ölkənin elektrik enerjisi istehsal gücü təxminən iki dəfə artaraq 10 min meqavata çatıb. Hazırda istifadə olunmayan ən azı 2 min meqavat gücün mövcudluğu isə data mərkəzləri və süni intellekt infrastrukturunun inkişafı üçün mühüm baza rolunu oynayır.Komissiya sədri əlavə edib ki, Prezident İlham Əliyevin rəhbərliyi ilə rəqəmsallaşma istiqamətində həyata keçirilən islahatlar nəticəsində bu sahədə institusional mexanizmlər daha da gücləndirilib. Dövlət başçısının Fərmanı ilə yaradılan Azərbaycan Respublikasının Rəqəmsal İnkişaf Şurasına, Birinci vitse-prezident Mehriban Əliyevanın sədrliyi ilə, “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı”nın icrasına nəzarət və nəzərdə tutulan tədbirlərin əlaqələndirilməsi həvalə olunub.
