Dövlət Miqrasiya Xidməti 2026-cı ilin ilk altı ayı ərzində miqrasiya qanunvericiliyinin pozulması ilə bağlı ümumilikdə 9757 inzibati qərar qəbul edib.
Dövlət Miqrasiya Xidmətinin yaydığı məlumata görə, 2026-cı ilin birinci yarımili ərzində əcnəbi və vətəndaşlığı olmayan şəxslərin ölkədə olma, yaşama, əmək fəaliyyətinə cəlb olunma və digər miqrasiya qaydalarının pozulması ilə bağlı ümumilikdə 9757 inzibati qərar qəbul edilib.Məlumata əsasən, barəsində inzibati qərar verilən şəxslərdən 4852 nəfər Dövlət Miqrasiya Xidməti tərəfindən qanunsuz miqrasiyaya qarşı keçirilən nəzarət tədbirləri zamanı saxlanılıb. Araşdırmalar nəticəsində onların ölkədə olma və yaşama hüququ verən sənədlər olmadan yaşadıqları, ölkəyə gəliş məqsədinə uyğun olmayan fəaliyyət göstərdikləri, qanunsuz əmək fəaliyyətinə cəlb edildikləri və ya qeydiyyatda olduqları ünvanda yaşamadıqları müəyyən edilib.Hesabat dövründə miqrasiya qanunvericiliyini pozduqları üçün 850 əcnəbi inzibati qaydada Azərbaycan ərazisindən çıxarılıb və onların ölkəyə yenidən girişinə qanunvericiliklə müəyyən edilmiş müddət ərzində məhdudiyyət tətbiq olunub. Digər şəxslərin isə ölkədə yaşamalarının qanuniləşdirilməsi və ya ölkəni könüllü şəkildə tərk etmələri təmin edilib.Bundan əlavə, ilk yarımildə qanunsuz miqrasiyanın təşkilinə dair 4 fakt aşkarlanıb. Aparılan araşdırmalar zamanı əcnəbilərin müxtəlif məqsədlərlə ölkəyə gətirilməsi, sonradan isə onlara qanunsuz yollarla iş və müvəqqəti yaşamaq üçün icazələrin alınmasına cəhd göstərildiyi müəyyən olunub. Toplanmış materiallar hüquqi qiymət verilməsi üçün aidiyyəti hüquq-mühafizə orqanlarına göndərilib. Dövlət Miqrasiya Xidməti qanunsuz miqrasiyaya qarşı mübarizə tədbirlərinin fasiləsiz davam etdirildiyini vurğulayıb.
