Azərbaycanın ən yüksək təhsil səviyyəsinə malik və ən aşağı təhsil göstəricilərinə sahib rayonları
Elpress.az-ın Fed.az-a istinadən verdiyi məlumata əsasən, Azərbaycan regionları üzrə əhalinin ali təhsil göstəriciləri uzun illərdir diqqət mərkəzində olan mövzulardandır. Sonuncu rəsmi siyahıyaalınma nəticələrinə əsasən, ölkənin müxtəlif rayon və şəhərləri arasında bu sahədə ciddi fərqlər müşahidə olunur.Ən yüksək ali təhsilli əhali payı Bakı şəhərinin mərkəzi rayonlarında qeydə alınıb. Yasamal, Səbail, Nəsimi, Nərimanov və Binəqədi rayonları ilk sıralarda yer alaraq təxminən 23–27 faiz aralığında göstəricilərlə fərqlənir. Xətai və Nizami rayonlarında bu rəqəm nisbətən aşağı olsa da, yenə də paytaxt üzrə orta göstəricidən yüksək sayılır.Bakı şəhəri ümumi olaraq götürüldükdə, ali təhsilli əhalinin payı təxminən 20 faiz ətrafında formalaşır. Paytaxtın digər rayonlarında – Pirallahı, Suraxanı, Xəzər və Sabunçu kimi ərazilərdə isə bu göstərici daha aşağı səviyyədədir.Regionlar və şəhərlər üzrə baxdıqda Gəncə, Sumqayıt, Naxçıvan və bəzi digər şəhərlərdə göstəricilər orta səviyyədə dəyişir və təxminən 14–19 faiz aralığında yerləşir. Bu ərazilərdə ali təhsilli əhali payı paytaxta nisbətən aşağı, lakin bəzi kənd rayonlarına nisbətən daha yüksəkdir.Ən aşağı göstəricilər əsasən kənd rayonlarında qeydə alınıb. Cəlilabad, Ucar, Hacıqabul, Sabirabad, Xaçmaz və bir sıra digər rayonlarda ali təhsilli əhalinin payı 5–7 faiz aralığında dəyişir. Ümumilikdə isə aşağı göstəricili rayonlar daha çox ölkənin mərkəzindən uzaq bölgələrdə cəmlənib.Qeyd edilir ki, bu fərqlər 2019-cu il əhalinin siyahıyaalınması məlumatlarına əsaslanır və növbəti genişmiqyaslı yenilənmiş statistikanın 2029-cu ildə aparılacaq siyahıyaalmadan sonra açıqlanması gözlənilir.
