Bakıda sentyabrın 20-dən 28-dək bəzi yollar nəqliyyat üçün bağlanacaq
Elpress.az xəbər verir ki, Bakı Şəhər Dövlət Yol Polisi İdarəsi “2026 Formula 1 Azərbaycan Qran Prisi” ilə əlaqədar sürücülərə və digər hərəkət iştirakçılarına müraciət edib.Paytaxtda nəqliyyat sıxlığının qarşısının alınması məqsədilə sentyabrın 24-dən 26-dək Bakı şəhərinə ətraf kənd və qəsəbələrdən, eləcə də digər şəhər və rayonlardan gələn şəxslərə ictimai nəqliyyatdan istifadəyə üstünlük vermələri tövsiyə olunub. Paytaxt sakinlərindən isə yarış günlərində fərdi avtomobillərdən mümkün qədər az istifadə etmələri və şəhərin mərkəzi hissəsinə ictimai nəqliyyatla hərəkət etmələri xahiş edilib.Bildirilib ki, Üzeyir Hacıbəyli və Puşkin küçələrinin kəsişməsindən Bülbül prospekti istiqamətində yeni tranzit dəhlizi təşkil olunacaq. Yarışla əlaqədar paytaxtın müəyyən ərazilərində nəqliyyat məhdudiyyətləri də tətbiq ediləcək.İlkin məhdudiyyət sentyabrın 19-u saat 21:00-dan qüvvəyə minəcək və Puşkin küçəsinin Üzeyir Hacıbəyli küçəsi və Neftçilər prospekti ilə kəsişən hissəsini əhatə edəcək. Bu məhdudiyyət yarış başa çatana qədər davam edəcək.Bakı Şəhər Halqasının keçdiyi küçələr və trekin əhatə etdiyi ərazilər isə sentyabrın 20-si saat 01:00-dan sentyabrın 28-i saat 08:00-dək nəqliyyatın hərəkəti üçün bağlı olacaq.Məhdudiyyət tətbiq edilən ərazilərə giriş və çıxış yalnız “Yaşayış Yerinə Giriş İcazəsi” ilə mümkün olacaq. Sentyabrın 21 və 22-də müəyyən giriş-çıxış nöqtələri saat 07:00-09:00 və 18:00-20:00 aralığında, sentyabrın 23-də isə 07:00-09:00 və 20:00-22:00 saatlarında nəqliyyat üçün açıq olacaq.Məhdudiyyətlər dövründə ictimai nəqliyyat və ağır tonnajlı yük avtomobilləri istisna olmaqla, digər nəqliyyat vasitələrinin hərəkəti müəyyən edilmiş tranzit dəhlizləri ilə təmin ediləcək.Tranzit dəhlizlərində fövqəladə hallar istisna olmaqla, parklanma, sərnişinlərin mindirilməsi və düşürülməsi qadağan ediləcək. Həmin ərazilərdə maksimal sürət həddi saatda 50 kilometr müəyyənləşdirilib.
