Mayın 23-də VI “Yüksəliş” müsabiqəsinin Analitik təhlil imtahanına başlanılıb.
Elpress.az-ın yaydığı məlumata görə, bununla bağlı müsabiqə tərəfindən açıqlama verilib.Qeyd olunub ki, imtahan 2 gün ərzində 4 sessiya şəklində təşkil ediləcək. Analitik təhlil mərhələsi Dövlət İmtahan Mərkəzinin Elektron İmtahanlar Korpusunda, 56, 158, 238 və 263 nömrəli tam orta məktəblərdə, Sumqayıt şəhərindəki 1 nömrəli tam orta məktəbdə, Nərimanov rayonu Məktəb-Lisey Kompleksində, Azərbaycan İdman Akademiyasında, Azərbaycan Tibb Universitetinin 5 saylı tədris binasında, həmçinin Naxçıvan şəhərində yerləşən 4 nömrəli məktəbdə yaradılan imtahan mərkəzlərində keçiriləcək.Namizədlər öncədən seçdikləri 10:00 və 15:30 saatlarına uyğun sessiyalarda iştirak edirlər. Xaricdə olan iştirakçılar üçün isə proktorinq üsulu ilə distant formatda 4 sessiyadan ibarət imtahan təşkil olunub.Məlumata əsasən, əyani mərhələnin ilk turu hesab edilən Analitik təhlil imtahanında 7315 nəfər iştirak edəcək.İmtahan Verbal, Rəqəmsal və Abstrakt təhlil olmaqla üç blokdan ibarətdir. İştirakçılara tapşırıqları yerinə yetirmək üçün ümumilikdə 3 saat vaxt verilib.Ədalətli rəqabətin qorunması məqsədilə nəticələrin hesablanması bir sıra beynəlxalq imtahanlarda tətbiq olunan T-şkala sistemi əsasında aparılacaq. Bu yanaşma TOEFL, GMAT və SAT kimi beynəlxalq qiymətləndirmə sistemlərində istifadə edilən müasir metodlardan hesab olunur.Analitik təhlil mərhələsinin nəticələrinin imtahan bitdikdən sonra 5-7 iş günü ərzində iştirakçıların şəxsi kabinetlərinə göndəriləcəyi bildirilib.Xatırladılıb ki, “Yüksəliş” müsabiqəsi Azərbaycan Prezidenti İlham Əliyev tərəfindən 26 iyul 2019-cu il tarixində imzalanan Sərəncam əsasında təsis edilib. Qaliblər mentor dəstəyi ilə birillik fərdi inkişaf proqramı və 20 min manat məbləğində mükafat əldə edirlər.Həmçinin sayca altıncı “Yüksəliş” müsabiqəsinin keçirilməsi ilə bağlı dövlət başçısı İlham Əliyev 10 dekabr 2025-ci ildə müvafiq Sərəncam imzalayıb.
