Xaçmaz, Quba, Qusar, Şabran, Siyəzən və Xızıda şəhidlərin xatirəsi anılıb
Elpress.az xəbər verir ki, 27 Sentyabr – Anım Günü ilə əlaqədar Azərbaycanın şimal rayonlarında şəhidlərin xatirəsinə həsr olunan müxtəlif tədbirlər keçirilib.Xaçmazda Şəhidlər xiyabanında təşkil olunan mərasim zamanı məşəl önünə əklil qoyulub, Milli Qəhrəman Yavər Şahbazovun büstü ziyarət edilib və şəhidlərin xatirə lövhələri önünə qərənfillər düzülüb.Tədbir çərçivəsində şəhid ailələri ilə görüş keçirilib. Çıxışlarda şəhidlərin xalqın yaddaşında daim yaşayacağı vurğulanıb.Qubada rayon ictimaiyyətinin nümayəndələri Şəhidlər xiyabanını ziyarət edərək şəhidlərin xatirəsinə ehtiramlarını ifadə ediblər. Daha sonra rayon ərazisində ağacəkmə aksiyası təşkil olunub. Aksiyada rayon rəhbərliyi ilə yanaşı, müxtəlif qurumların əməkdaşları, şəhid ailələri, qazilər və könüllülər iştirak ediblər.Qusarda da Şəhidlər xiyabanı ziyarət olunub, şəhidlərin xatirəsi yad edilib. Ardınca ağacəkmə aksiyası keçirilib və şəhid ailələrinə evlərində baş çəkilib.Şabran, Siyəzən və Xızı rayonlarında da Anım Günü ilə bağlı silsilə tədbirlər təşkil olunub.Saat 12:00-da bütün rayonlarda şəhidlərin xatirəsi bir dəqiqəlik sükutla yad edilib. Bu zaman nəqliyyat vasitələrinin və piyadaların hərəkəti dayandırılıb, avtomobillərdən siqnal səsləri verilib.
