Bəzi işçilər üçün həftəlik iş vaxtı 24 və ya 36 saatdan artıq ola bilməz
Elpress.az xəbər verir ki, Əmək qanunvericiliyinə əsasən, müəyyən kateqoriyalara aid işçilər üçün qısaldılmış iş vaxtı tətbiq olunur. Bu zaman şəxsin yaşı, səhhəti, əmək şəraiti, gördüyü işin xüsusiyyətləri və digər amillər nəzərə alınır.16 yaşınadək işçilərin həftəlik iş vaxtı 24 saatdan çox olmamalıdır.16 yaşdan 18 yaşadək şəxslər, orqanizmin funksiyalarının 61-100 faiz pozulmasına görə I və II dərəcə əlilliyi müəyyən edilmiş şəxslər, hamilə qadınlar və yaşyarımadək uşağı olan qadınlar üçün həftəlik iş vaxtı 36 saatdan artıq müəyyən edilə bilməz.Eyni məhdudiyyət 3 yaşınadək uşağını təkbaşına böyüdən valideynlərə də şamil olunur.Bundan əlavə, fiziki, kimyəvi, bioloji və insan sağlamlığı üçün zərərli digər ağır istehsalat amillərinin mövcud olduğu əmək şəraitində çalışanlar üçün də qısaldılmış iş vaxtı nəzərdə tutulur.Yüksək həssaslıq, həyəcan, eləcə də zehni, fiziki və əsəb gərginliyi yaradan iş yerlərində çalışan şəxslər də bu hüquqdan yararlana bilərlər.
