Elpress.az xəbər verir ki, isti hava şəraiti ilə əlaqədar vətəndaşların çimərliklərə, su hövzələrinə və digər istirahət məkanlarına kütləvi axını nəzərə alınaraq, həmin ərazilərdə polis əməkdaşlarının fasiləsiz xidməti təşkil edilib.
Paytaxt Bakı ilə yanaşı, respublikanın bütün turizm zonalarında asayişin və təhlükəsizliyin təmin olunması, həmçinin nəqliyyatın hərəkətinin davamlılığının qorunması məqsədilə naryad qrupları ərazilərə təhkim olunub.
Polis əməkdaşları ictimai asayişin qorunması ilə yanaşı, vətəndaşların təhlükəsiz istirahətinin təmin edilməsi, mümkün xoşagəlməz halların qarşısının alınması və zərurət yarandıqda operativ müdaxilənin həyata keçirilməsi istiqamətində gücləndirilmiş rejimdə xidmət aparırlar.
Vətəndaşlardan istirahət zamanı, xüsusilə çimərliklərdə təhlükəsizlik qaydalarına ciddi riayət etmələri, uşaqları nəzarətsiz qoymamaları və ictimai asayişi pozan davranışlardan çəkinmələri xahiş olunur.
Həmçinin hər hansı təhlükəli və ya şübhəli hal müşahidə edən şəxslərə dərhal polisə məlumat vermələri tövsiyə edilir.
