NİİM sürücüləri əks zolağa çıxmamağa və yolayrıcında qaydalara əməl etməyə çağırıb
Elpress.az xəbər verir ki, DİN-in Nəqliyyatı İntellektual İdarəetmə Mərkəzi Suraxanı rayonunun Hövsan (MİDA) yolunda ötən gün yaranan nəqliyyat sıxlığı ilə bağlı açıqlama verib.Mərkəzin İctimaiyyətlə əlaqələr sektorunun müdiri Ömər Xıdırov bildirib ki, müşahidə kameralarının görüntülərinə əsasən, bəzi sürücülər alternativ yol kimi istifadə etdikləri həmin ərazidə əks istiqamətdə hərəkət zolağına çıxaraq qarşıdan gələn nəqliyyat vasitələrinin hərəkətinə mane olublar.Onun sözlərinə görə, yolayrıcında bəzi sürücülərin hərəkət qaydalarını pozması da süni sıxlığın yaranmasına səbəb olub. Nəticədə Zığ şosesi-Hövsan, Hövsan-Zığ şosesi və “Kənd Hövsan” istiqamətlərində nəqliyyatın hərəkətində ciddi çətinlik yaranıb.Yol polisi əməkdaşlarının müdaxiləsindən sonra ərazidə yaranan xaotik vəziyyət aradan qaldırılıb və nəqliyyatın hərəkəti bərpa olunub.NİİM sürücülərə yol hərəkəti qaydalarına riayət etməklə yanaşı, digər hərəkət iştirakçılarına da hörmətlə yanaşmağı tövsiyə edib. Bildirilib ki, yollarda təmir işləri, hərəkət məhdudiyyətləri və ya yol-nəqliyyat hadisələri səbəbindən sıxlıqların yaranması mümkündür.Qeyd olunub ki, bəzi sürücülərin sıxlıq zamanı əks istiqamətdə hərəkət zolağına çıxması, qarşıdan gələn nəqliyyat vasitələrinin yoluna daxil olması və yolayrıcında növbəni pozaraq irəliləməsi tıxacların daha uzun müddət davam etməsinə səbəb olur.
