Bu gün türk dövlətləri arasında həmrəyliyin və qarşılıqlı əməkdaşlığın inkişafında mühüm əhəmiyyət daşıyan Türk Dövlətləri Əməkdaşlıq Günü qeyd olunur.
Elpress.az xəbər verir ki, bu əlamətdar gün 2009-cu il oktyabrın 3-də Naxçıvanda imzalanmış saziş əsasında təsis edilib. Həmin sənəd Türkdilli Dövlətlərin Əməkdaşlıq Şurasının yaradılmasının hüquqi əsasını formalaşdırıb.
Naxçıvan Zirvə görüşündə Azərbaycan, Türkiyə, Qazaxıstan və Qırğızıstanın dövlət başçıları bir araya gəlib. Görüş zamanı əməkdaşlığın müxtəlif istiqamətlərdə genişləndirilməsi ilə bağlı mühüm sənədlər qəbul edilib.
Sonrakı illərdə təşkilatın fəaliyyət dairəsi daha da genişlənib və Türk Dövlətləri Təşkilatı adı altında yeni mərhələyə keçib. Təşkilat ortaq tarix, dil, mədəniyyət və milli kimlik kimi ümumi dəyərlər əsasında üzv və müşahidəçi dövlətlər arasında əlaqələrin inkişafına xidmət edir.
TDT çərçivəsində siyasi, iqtisadi, mədəni, təhsil, nəqliyyat və digər sahələrdə əməkdaşlığın gücləndirilməsi istiqamətində müxtəlif mexanizmlər yaradılıb. Dövlət Başçıları Şurası, Xarici İşlər Nazirləri Şurası, Ağsaqqallar Şurası və Katiblik təşkilatın əsas fəaliyyət strukturları sırasında yer alır.
Bununla yanaşı, TÜRKSOY, TÜRKPA, Beynəlxalq Türk Akademiyası, Türk Mədəniyyəti və İrsi Fondu, Türk Ticarət və Sənaye Palatası və digər qurumlar türk dövlətləri arasında əlaqələrin inkişafında mühüm rol oynayır.
3 Oktyabr türk dövlətləri arasında ortaq dəyərlər və əməkdaşlıq platformasının formalaşmasında mühüm mərhələnin başlanğıcı kimi qeyd olunur.
