Həssas qruplardan olan şəxslər 14 istiqamət üzrə bacarıqlarını inkişaf etdirirlər
Elpress.az xəbər verir ki, DOST İnklüziv İnkişaf və Yaradıcılıq Mərkəzi və onun filiallarında hazırda 360-dək benefisiar müxtəlif istiqamətlər üzrə təlimlərə cəlb olunub.Benefisiarlar ümumilikdə 14 fəaliyyət sahəsi üzrə təlimlərdə iştirak edərək bacarıqlarını təkmilləşdirirlər. Onlardan 187 nəfəri əsas mərkəzdə, digər şəxslər isə İsmayıllı və Bərdədə fəaliyyət göstərən “DOST Evi” filiallarında xidmətlərdən yararlanır.Birinci vitse-prezident Mehriban Əliyevanın təşəbbüsü ilə yaradılan mərkəzin açılışı 2021-ci ilin oktyabrında keçirilib. Müəssisə Cənubi Qafqazda ilk və ən böyük inklüziv yaradıcılıq və inkişaf məkanı kimi fəaliyyət göstərir.Mərkəz və filiallarında əlilliyi olan şəxslər, şəhid ailələrinin üzvləri və digər həssas qruplara aid insanlar təsviri incəsənət, dulusçuluq, musiqi, dərzilik, modelyerlik, xalçaçılıq, toxuma və tikmə, bədii oyma və digər sahələr üzrə təlimlərdə iştirak edirlər.Təlim və ustad dərsləri vasitəsilə iştirakçıların yaradıcı potensialının inkişaf etdirilməsi, yeni bacarıqlar qazanması və cəmiyyətə inteqrasiyasının dəstəklənməsi istiqamətində iş aparılır.İndiyədək DOST İnklüziv İnkişaf və Yaradıcılıq Mərkəzi və onun filiallarının xidmətlərindən ümumilikdə 1055 benefisiar yararlanıb.
