Pakistanın şimal-qərbində törədilən terror aktı insan tələfatı və yaralanmalarla nəticələnib.
Elpress.az xarici mediaya istinadən xəbər verir ki, Xayber Paxtunxva əyalətində kamikadze terrorçu məscidin yaxınlığında üzərindəki partlayıcı qurğunu işə salıb.İlkin məlumata görə, terrorçu əvvəlcə məscidə daxil olmağa cəhd göstərsə də, buna nail olmayıb. Bundan sonra o, binanın qarşısında özünü partladıb.Hadisə Lakki Marvat rayonunun Xayro Xel ərazisində, cümə namazı üçün toplaşan insanların olduğu vaxt baş verib. Partlayış nəticəsində azı bir mülki şəxs həyatını itirib, yeddi polis əməkdaşı isə müxtəlif dərəcəli xəsarətlər alıb.Yaralananlar tibbi yardım göstərilməsi üçün yaxınlıqdakı xəstəxanalara çatdırılıblar.Hadisədən sonra hüquq-mühafizə orqanları ərazidə təhlükəsizlik tədbirlərini gücləndirib, partlayışın səbəblərinin araşdırılması üçün istintaqa başlayıb.Hələlik terror aktına görə hər hansı silahlı qruplaşma məsuliyyəti üzərinə götürməyib.Qeyd edək ki, son dövrlər Pakistanın Xayber Paxtunxva və Bəlucistan əyalətlərində terror hücumlarının sayında yenidən artım müşahidə olunur.
