Konqo Demokratik Respublikasında Ebola virusunun yayılması davam edir. Xəstəlik ölkənin bir neçə bölgəsini əhatə edib, Keniyada da virusla bağlı yoluxma faktı təsdiqlənib.
Elpress.az xəbər verir ki, “Al Jazeera”nın Ümumdünya Səhiyyə Təşkilatına (ÜST) istinadən yaydığı məlumata görə, oktyabrın 6-dək Konqoda 8 728 yoluxma və 4 205 ölüm faktı qeydə alınıb.
Virus ölkənin yeddi əyalətində 64 səhiyyə zonasına yayılıb. Şimali Kivu əyalətinin Alimbongo bölgəsində ilk dəfə dörd yoluxma aşkarlanıb, onlardan ikisi həyatını itirib.
Keniyada da xaricdən gələn şəxsdə Ebola virusu təsdiqlənib. Konqoda yaşayan Keniya vətəndaşı Uqanda üzərindən Nayrobiyə səfər edib və oktyabrın 5-də vəfat edib. Keniya rəsmiləri onunla təmasda olmuş 28 nəfəri müəyyənləşdirib. Həmin şəxsin olduğu təyyarənin sərnişinləri və ekipaj üzvləri ilə bağlı da araşdırma aparılır.
“Sərhədsiz Həkimlər” təşkilatı Konqodakı müalicə mərkəzlərində çarpayı çatışmazlığının yarandığını bildirib. ÜST isə epidemiyanın qarşısını almaq üçün yoluxmuş şəxslərlə təmasda olanların vaxtında müəyyənləşdirilməsinin vacibliyini vurğulayıb.
Qeyd edək ki, söhbət Bundibugyo virusundan gedirsə, bu növ Ebola virusuna qarşı təsdiqlənmiş peyvənd və xüsusi müalicə vasitəsi yoxdur.
