Kiberhücum nəticəsində elektrik stansiyasının fəaliyyəti dörd gün dayanıb
Elpress.az xəbər verir ki, İranla əlaqəli olduğu bildirilən hakerlər Böyük Britaniyada elektrik stansiyalarından birinə kiberhücum həyata keçirib. Hücum nəticəsində obyektin fəaliyyəti müvəqqəti olaraq dayanıb.“The Telegraph”ın məlumatına görə, bu, İranla əlaqəli hakerlərin Britaniyada elektrik stansiyasının işini dayandırdığı ilk hadisə kimi qiymətləndirilir. Təhlükəsizlik səbəbilə hücuma məruz qalan obyektin adı açıqlanmayıb.Məlumata əsasən, elektrik stansiyası təxminən dörd gün fəaliyyət göstərməyib və bu müddət ərzində əməkdaşlar sistemin bərpası üzərində çalışıblar. Obyektin nisbətən kiçik olması səbəbindən insident ölkənin ümumi elektrik təchizatına və enerji istehsalına ciddi təsir göstərməyib.Nəşrin yazdığına görə, hücumun əsas məqsədi enerji sisteminə real zərər vurmaqdan daha çox, İranla əlaqəli haker qruplarının Britaniyanın kritik infrastrukturuna müdaxilə etmək imkanlarını nümayiş etdirmək ola bilər.Hadisədən sonra Britaniya hökuməti enerji şirkətlərinin rəhbərləri ilə təhlükəsizlik brifinqi keçirib. Müəssisələrə enerji sistemlərinin qorunması və mümkün kiberhücumlara qarşı görüləcək tədbirlərlə bağlı tövsiyələr göndərilib. İnsident barədə Milli Kibertəhlükəsizlik Mərkəzinə də məlumat verilib.
