Hindistan hökumətindən viza qaydalarına sərtləşdirici dəyişiklik
Elspress.az-ın məlumatına əsasən, Hindistan Daxili İşlər Nazirliyi ölkədə viza qaydalarına yeni sərtləşdirilmiş dəyişikliklər tətbiq edib. Bildirilib ki, 180 gündən artıq ölkədə qalmaq istəyən əcnəbilərə bu imkan yalnız “müstəsna hallar” çərçivəsində və xüsusi icazə əsasında veriləcək.Yeni qaydalara əsasən, 180 gün və ya daha qısa müddətli viza ilə Hindistana daxil olan şəxslər qalma müddətini uzatmaq istədikdə, viza müddəti bitməmişdən əvvəl mütləq şəkildə müvafiq qeydiyyat prosedurunu tamamlamalıdırlar. Əvvəlki qaydalarla müqayisədə isə daha sərt yanaşma tətbiq edilib — belə ki, əvvəllər uzadılma müraciətləri viza müddəti bitdikdən sonra 14 gün ərzində də qəbul olunurdu.Qaydaların ən diqqətçəkən məqamı isə “müstəsna hallar” anlayışının dəqiq izahının verilməməsidir ki, bu da tətbiq prosesində daha sərt və selektiv qərarların qəbul olunacağı ehtimalını artırır.Rəsmi açıqlamaya görə, bu dəyişikliklərin əsas məqsədi ölkədə xarici vətəndaşların qeydiyyat sistemini gücləndirmək, miqrasiya nəzarətini təkmilləşdirmək və ümumi təhlükəsizlik prosedurlarını daha effektiv idarə etməkdir.
