Rusiyanın keçmiş kəşfiyyatçısı Dmitri Senin Kremldən necə xilas olduğunu açıqlayıb
Elpress.az xəbər verir ki, Rusiya Federal Təhlükəsizlik Xidmətinin (FSB) keçmiş yüksək vəzifəli əməkdaşı, 47 yaşlı Dmitri Senin ölkədən qaçmaq üçün müraciət etdiyi qeyri-adi üsulla beynəlxalq medianın gündəminə gəlib. Keçmiş agentin sözlərinə görə, o, korrupsiya araşdırması apardığı zaman “xəyanət” ittihamı ilə üzləşib və Kremlin təqiblərindən xilas olmaq üçün Rusiyadan Qazaxıstana ölü inəyin cəsədinin içində keçib.Sərhəddəki termal kameralara düşməmək üçün əyninə rezin geyim, əleyhqaz geyinərək bədənini alüminium folqa ilə bükən Senin qaçaqmalçıların köməyi ilə inək cəsədində təxminən bir saat gizləndiyini bildirib. Traktora yüklənən heyvan meyiti ilə sərhədi keçdikdən sonra piyada yolla əvvəlcədən müəyyənləşdirilən nöqtəyə çatıb və daha sonra Monteneqroya sığınıb. Hadisə dünya mətbuatında böyük rezonans doğurub.
