Zaqatala rayonunda dağ çaylarında sel və daşqın təhlükəsinin qarşısının alınması istiqamətində genişmiqyaslı tədbirlər davam etdirilir.
Elpress.az xəbər verir ki, Azərbaycan Dövlət Su Ehtiyatları Agentliyinin tabeliyində fəaliyyət göstərən Zaqatala Su Meliorasiya Sistemlərinin İstismarı İdarəsi tərəfindən rayonun müxtəlif ərazilərində məcratəmizləmə və sahilbərkitmə işləri aparılır.
Məlumata görə, hazırda Talaçayın sağ və sol sahillərində, eləcə də Muxaxçay, Katexçay və Bəkməzçay ərazilərində sel riski yüksək olan zonalarda ağır texnikalar vasitəsilə mühafizə tədbirləri görülür. İşlərin məqsədi yaşayış məntəqələrini, kənd təsərrüfatı sahələrini və mühəndis-kommunikasiya infrastrukturunu sel və daşqınların yaratdığı təhlükələrdən qorumaqdır.
Bununla yanaşı, rayon əhalisinin fasiləsiz içməli su ilə təmin olunması istiqamətində də işlər davam etdirilir. Son günlər yağan intensiv yağışların yaratdığı fəsadların aradan qaldırılması üçün qəzalar operativ şəkildə aradan qaldırılır və su mənbələrində bərpa tədbirləri həyata keçirilir.
Qeyd edək ki, iyul ayında şimal-qərb bölgəsində müşahidə olunan güclü leysan yağışları nəticəsində dağ çaylarından sel keçmiş, Azərbaycan Dövlət Su Ehtiyatları Agentliyi tərəfindən ərazilərə ağır texnikalar cəlb edilərək təxirəsalınmaz tədbirlər görülmüşdü. Hazırda rayonun bütün dağ çaylarında vəziyyət nəzarətdə saxlanılır.
