Azərbaycan ilə NATO arasında humanitar minatəmizləmə sahəsində əməkdaşlığın genişləndirilməsi məsələləri müzakirə olunub.
Elpress.az xəbər verir ki, bu barədə Azərbaycan Respublikası Minatəmizləmə Agentliyindən məlumat verilib.
Müzakirələr ANAMA İdarə Heyəti sədrinin müavini Samir Poladov ilə NATO-nun Silahlara Nəzarət, Tərksilah və Kütləvi Qırğın Silahlarının Yayılmasının Qarşısının Alınması bölməsinin rəhbəri Eirini Lemos-Maniatinin rəhbərlik etdiyi nümayəndə heyəti arasında keçirilən görüşdə aparılıb.
Görüşdə humanitar minatəmizləmə sahəsində əməkdaşlığın hazırkı vəziyyəti, beynəlxalq tərəfdaşların dəstəyi, eləcə də Sülh və Təhlükəsizlik naminə Elm (SPS) Proqramı çərçivəsində innovativ minatəmizləmə metodlarının tətbiqi müzakirə edilib.
Tərəflər yeni nəsil texnologiyaların minatəmizləmə fəaliyyətində tətbiqi və Azərbaycanın SPS Proqramı çərçivəsində digər cari və gələcək layihələrdə iştirakı barədə fikir mübadiləsi aparıblar.
Samir Poladov minaların keçmiş məcburi köçkünlərin doğma yurdlarına qayıdışına ciddi maneə yaratdığını, bərpa və yenidənqurma proseslərini ləngitdiyini və humanitar, iqtisadi və ekoloji fəsadlara səbəb olduğunu vurğulayıb.
Görüş zamanı NATO nümayəndə heyətinə ANAMA-nın fəaliyyəti, Göygöl Təlim Mərkəzi və Agentliyin beynəlxalq tərəfdaşlıqları barədə də məlumat verilib.
