Rəqəmsal bankçılıq xidmətlərinin geniş yayılması ilə bank köçürmələrində diqqətsizlikdən qaynaqlanan səhvlərin sayı da artır.
Yanlış kart nömrəsinə və ya başqa şəxsə vəsait göndərilməsi hallarında pulun geri qaytarılması yalnız müəyyən hüquqi prosedurlar çərçivəsində mümkündür.
Elpress.az xəbər verir ki, Hüquqşünas Rəşad Əliyevin sözlərinə görə, belə hallarda ilk növbədə vəsaiti göndərən şəxs müraciət etdiyi banka məlumat verməlidir. Bank qarşı tərəflə əlaqə saxlayaraq səhvən köçürülmüş məbləğin geri qaytarılmasını təklif edir. Qarşı tərəf razılıq verərsə, məsələ qısa müddətdə həll olunur.
Lakin vəsaiti qəbul edən şəxs pulu qaytarmaqdan imtina edərsə, hüquq-mühafizə orqanlarına müraciət nəticə vermir. Bu halda vəsaitin geri alınmasının yeganə yolu mülki qaydada məhkəməyə müraciət etməkdir.
Hüquqşünas bildirib ki, Mülki Məcəllənin 1091.1-ci maddəsinə əsasən, hüquqi əsas olmadan əldə edilən vəsait əsassız varlanma hesab olunur və həmin şəxs aldığı məbləği geri qaytarmalıdır.
Bununla yanaşı, bank sirri ilə bağlı tələblərə görə, vəsaiti qəbul edən şəxsin məlumatları bank tərəfindən açıqlanmır ki, bu da məhkəmə prosesində əlavə çətinliklər yarada bilər.
