Azərbaycan qanuni miqrasiyanın təşviqi istiqamətində tətbiq etdiyi mexanizmləri genişləndirməyə davam edir.
Elpress.az xəbər verir ki, bu barədə Dövlət Miqrasiya Xidmətinin rəisi Vüsal Hüseynov “Miqrasiya sahəsində media məlumatlılığı” mövzusunda keçirilən media-tur zamanı məlumat verib.Onun sözlərinə görə, ölkəyə qanuni yollarla gəlmək istəyən əcnəbilər üçün prosedurların sadələşdirilməsi və xidmətlərin əlçatanlığının artırılması əsas prioritetlərdəndir.
Bu məqsədlə vizasız rejimin əhatə dairəsi genişləndirilir, sərhəd keçid prosedurları təkmilləşdirilir və elektron xidmətlər inkişaf etdirilir.Vüsal Hüseynov bildirib ki, hazırda Azərbaycan 17 ölkənin vətəndaşlarına vizasız giriş imkanı yaradır. Bununla yanaşı, 89 ölkənin vətəndaşları “ASAN Viza” sistemi vasitəsilə elektron viza ala bilir, 11 ölkənin vətəndaşları isə vizanı birbaşa hava limanında rəsmiləşdirmək imkanına malikdir.
DMX rəisi əlavə edib ki, son dövrdə Yaponiya, Oman, Koreya Respublikası, Bosniya və Herseqovina da daxil olmaqla bir sıra ölkələrlə vizasız rejimin tətbiqi istiqamətində yeni addımlar atılıb.
