İspaniyanın IE Universitetinin Liderlik və İnnovasiya Mərkəzi Bakıda açılıb. Layihə PAŞA Holding və SOCAR-ın strateji tərəfdaşlığı əsasında həyata keçirilib.
Elpress.az xəbər verir ki, ADA Universitetində yerləşən mərkəz Elm və Təhsil Nazirliyi, eləcə də İqtisadiyyat Nazirliyinin institusional dəstəyi ilə fəaliyyət göstərəcək.
Təşəbbüsün əsas məqsədi insan kapitalının inkişafına, biznes və akademik mühit arasında əməkdaşlığın genişləndirilməsinə, innovativ ideyaların tətbiqinə və sahibkarlıq ekosisteminin gücləndirilməsinə töhfə verməkdir. Mərkəzin gələcəkdə Mərkəzi Asiya ölkələri ilə əməkdaşlıq imkanlarını da genişləndirməsi nəzərdə tutulur.
Fəaliyyət üç istiqaməti əhatə edəcək. Təhsil və inkişaf çərçivəsində bakalavr, magistr, rəhbər şəxslər üçün ixtisaslaşmış təhsil və korporativ təlim proqramları təqdim olunacaq. Bu istiqamətin əsas layihələrindən biri “Azerbaijan Global MBA” (AZEMBA) proqramıdır.
Tədqiqat və innovasiya sahəsində sahibkarlıq, rəqəmsal transformasiya və regional rəqabət qabiliyyəti üzrə araşdırmalar aparılacaq. Digər istiqamət isə startapların, investorların və institusional tərəfdaşların beynəlxalq innovasiya şəbəkəsi ilə əlaqələndirilməsi, yeni biznes təşəbbüslərinin dəstəklənməsi olacaq.
SOCAR-ın vitse-prezidenti Ziba Mustafayeva açılış mərasimində bildirib ki, mərkəzin əsas prioriteti insanlara, onların bilik və bacarıqlarının inkişafına investisiya qoyulmasıdır. Onun sözlərinə görə, dayanıqlı inkişafın əsasını ideyaları reallaşdıran və dəyişikliklərə istiqamət verən insan kapitalı təşkil edir.
PAŞA Holding-in baş icraçı direktoru Cəlal Qasımov isə mərkəzin Azərbaycanın biznes mühitinin beynəlxalq təhsil və innovasiya ekosisteminə inteqrasiyasını gücləndirəcəyini, yerli istedadların potensialının inkişafına yeni imkanlar yaradacağını vurğulayıb.
Tədbirdə çıxış edən iqtisadiyyat nazirinin müavini Səməd Bəşirli beynəlxalq bilik və təcrübənin ölkəyə cəlb olunmasının, təhsil-biznes əlaqələrinin möhkəmləndirilməsinin əhəmiyyətini qeyd edib.
Mərasim çərçivəsində İqtisadiyyat Nazirliyi ilə IE Universiteti arasında İqtisadi Observatoriyanın yaradılması və inkişafına dair Çərçivə Əməkdaşlıq Sazişi də imzalanıb. Sənəd iqtisadi şaxələndirmə, məhsuldarlığın artırılması və rəqabət qabiliyyətinin gücləndirilməsi üzrə birgə tədqiqat və təhlillərin aparılmasını nəzərdə tutur.
