Azərbaycan Respublikasında Media və Yayım Şurasının strukturu təsdiq edilib.
Elpress.az xəbər verir ki, bununla bağlı Prezident İlham Əliyev avqustun 7-də Fərman imzalayıb.Fərmana əsasən, Media və Yayım Şurası Audiovizual Şuranın hüquqi varisi elan olunub. Audiovizual Şuranın bütün hüquq və öhdəlikləri, eləcə də əmlakı yeni yaradılan quruma verilib.
Sənədə əsasən, Media və Yayım Şurasının işçilərinin say həddi 108 ştat vahidi müəyyən edilib.Bununla yanaşı, “Azərbaycan Respublikasının Medianın İnkişafı Agentliyi” (MEDİA) publik hüquqi şəxs ləğv olunub. Agentliyin hüquq və öhdəlikləri, həmçinin əmlakı Media və Yayım Şurasına ötürülüb.
Fərmanda Nazirlər Kabinetinə bir ay müddətində Audiovizual Şuranın və MEDİA Agentliyinin balansında olan dövlət əmlakının yeni qurumun balansına verilməsi, cari ilin dövlət büdcəsində nəzərdə tutulmuş vəsait hesabına Şuranın fəaliyyətinin maliyyələşdirilməsi, inzibati bina ilə təmin edilməsi və əməkdaşların yeni qurumda komplektləşdirilməsi ilə bağlı zəruri tədbirlərin görülməsi tapşırılıb.
