Belçikanın paytaxtı Brüsseldə təşkil olunan III Beynəlxalq “Suqovuşan” minifutbol turnirinə yekun vurulub.
Müxtəlif ölkələrdə yaşayan azərbaycanlıların və digər xalqların nümayəndələrinin formalaşdırdığı həvəskar komandaların qatıldığı yarışda 24 kollektiv mübarizə aparıb. Elpress.az Azərtaca-a istinadən xəbər verir ki, Turnirdə Estoniyadakı azərbaycanlıları təmsil edən “Qarabağ Tallin” komandası da iştirak edib.Estoniya-Azərbaycan “Birlik” icmasının və azərbaycanlı sahibkarların dəstəyi ilə yarışa qatılan komanda uğurlu çıxışı ilə diqqət çəkib. Tallin təmsilçisi keçirdiyi 9 qarşılaşmanın 8-də qalib gələrək final mərhələsinə yüksəlməyi bacarıb.Həlledici oyunda rəqibinə uduzan “Qarabağ Tallin” turniri gümüş medallarla başa vurub.Komandanın üzvü Lev Visman isə turnir boyu nümayiş etdirdiyi oyuna görə yarışın ən yaxşı futbolçusu adına layiq görülüb.Qeyd edək ki, yarışda Gürcüstan, Qazaxıstan, Özbəkistan, Ukrayna və Pakistan da daxil olmaqla müxtəlif ölkə və təşkilatların komandaları iştirak ediblər.
