Azərbaycanın müdafiə naziri, general-polkovnik Zakir Həsənov ölkədə səfərdə olan Türkiyənin “Baykar” şirkətinin İdarə Heyətinin sədri Səlcuq Bayraktarın rəhbərlik etdiyi nümayəndə heyəti ilə görüş keçirib.
Elpress.az xəbər verir ki, görüş zamanı Azərbaycan və Türkiyə arasında hərbi əməkdaşlığın uğurla inkişaf etdiyi vurğulanıb. Müdafiə naziri Zakir Həsənov “Baykar”ın Türkiyənin müdafiə sənayesində mühüm yer tutduğunu qeyd edərək, qabaqcıl texnologiyaların tətbiqi və birgə istehsal imkanlarının genişləndirilməsinin əhəmiyyətini diqqətə çatdırıb.
Səlcuq Bayraktar göstərilən qonaqpərvərliyə görə təşəkkürünü bildirərək, qarşılıqlı səfərlərin Azərbaycan-Türkiyə hərbi və hərbi-texniki əməkdaşlığının daha da möhkəmlənməsinə töhfə verdiyini bildirib.Görüşdə Türkiyənin Azərbaycandakı fövqəladə və səlahiyyətli səfiri Birol Akgün də iştirak edib.
Tərəflər pilotsuz uçuş aparatları, radioelektron mübarizə sistemləri, insansız texnologiyalar və digər müdafiə sahələrində əməkdaşlıq perspektivləri ətrafında fikir mübadiləsi aparıblar.
