Azərbaycan Xarici İşlər Nazirliyi Ukrayna və Yaxın Şərqdə davam edən silahlı qarşıdurmalar fonunda vətəndaşlara müraciət edib.
Elpress.az xəbər verir ki, nazirliyin yaydığı bəyanatda hazırkı beynəlxalq təhlükəsizlik şəraitində müxtəlif regionlarda, xüsusilə Ukrayna və Yaxın Şərqdə davam edən münaqişələrin qlobal sülh və təhlükəsizlik üçün ciddi risk yaratdığı vurğulanıb.Qeyd edilib ki, son dövrlərdə həmin ərazilərdə olan Azərbaycan vətəndaşlarının hərbi əməliyyatlar nəticəsində həlak olması və ya müxtəlif dərəcəli xəsarətlər alması halları müşahidə edilir. Nazirlik bunun münaqişə zonalarında təhlükəsizlik risklərinin yüksək səviyyədə qaldığını göstərdiyini bildirib.XİN vətəndaşlara xaricə səfər etməzdən əvvəl gedəcəkləri ölkələrdəki vəziyyəti diqqətlə araşdırmağı, rəsmi qurumların xəbərdarlıqlarını nəzərə almağı və hərbi əməliyyatların aparıldığı ərazilərdən uzaq durmağı tövsiyə edib.Bəyanatda həmçinin vurğulanıb ki, Azərbaycan vətəndaşlarının muzdlu və ya könüllü şəkildə xarici ölkələrin ərazisində silahlı münaqişələrdə iştirak etməsi qanunvericiliyə əsasən cinayət məsuliyyəti yaradır.Nazirlik bildirib ki, Azərbaycanın xaricdəki diplomatik nümayəndəlikləri və konsulluqları vətəndaşların hüquq və maraqlarının qorunması istiqamətində fəaliyyətini davam etdirir. Bununla yanaşı, hər bir şəxsin öz təhlükəsizliyinə məsuliyyətlə yanaşmasının vacibliyi qeyd olunub.Xarici İşlər Nazirliyi beynəlxalq vəziyyətlə bağlı prosesləri izləməyə davam etdiyini də bəyan edib.
