Azərbaycanda qida səbətində mühüm yer tutan bitki yağlarının qiymətində artım müşahidə olunur.
Elpress.az xəbər verir ki, ölkənin bitki yağı tələbatının əsasən idxal hesabına ödənilməsi qiymət dəyişikliklərinin daxili bazara birbaşa təsir göstərməsinə səbəb olur.Məlumata görə, dünya bazarında bitki yağlarının qiyməti 2022-ci ildən bu yana ən yüksək səviyyəyə çatıb. Son göstəricilərə əsasən, bitki yağının orta qiyməti 1,3 faiz artaraq ton üzrə 1505 dollar təşkil edib.Ötən illə müqayisədə Azərbaycanda da əsas yağ növlərində qiymət artımı qeydə alınıb. Belə ki, günəbaxan yağının 1 litri orta hesabla 4,53 manatdan 4,96 manata yüksəlib. Qarğıdalı yağında qiymət 6,02 manatdan 6,46 manata, zeytun yağında isə 17,71 manatdan 18,12 manata qədər artıb.Mütəxəssislər bildirirlər ki, bitki yağları qlobal bazarda qiymət dəyişikliklərinə ən tez reaksiya verən məhsullar sırasındadır. İqtisadçı-ekspertlərin fikrincə, bu məhsullar üzrə yerli istehsalın məhdud olması və xammalın böyük hissəsinin idxaldan asılılığı qiymət artımını qaçılmaz edir.Qeyd olunur ki, Azərbaycanda istehlak olunan bitki yağları müxtəlif ölkələrdən idxal edilir. Günəbaxan yağı əsasən Rusiyadan, soya yağı isə daha çox Argentinadan gətirilir. 2025-ci ildə ölkəyə idxal olunan 169 min ton soya yağının böyük hissəsi Argentinanın payına düşüb.Eyni zamanda Türkiyədən günəbaxan, qarğıdalı və zeytun yağları idxal olunur ki, bu məhsullar əsasən qablaşdırılmış və markalı formada bazara çıxarılır.
