Hüsamettin İnanç Türkiyə ilə Azərbaycanın strateji tərəfdaşlığını Türk dünyası üçün örnək adlandırıb
Elpress.az xəbər verir ki , Türk politoloq Hüsamettin İnanç bildirib ki, Azərbaycan ilə Türkiyə arasında formalaşan münasibətlər təkcə dostluq və qardaşlıq anlayışları ilə məhdudlaşmır, ortaq tarixə, mədəniyyətə, milli kimliyə və strateji maraqlara əsaslanan xüsusi tərəfdaşlıq modelidir. Onun sözlərinə görə, Prezident İlham Əliyevin IV Şuşa Qlobal Media Forumunda səsləndirdiyi fikirlər bu reallığın növbəti təsdiqidir.Ekspert vurğulayıb ki, 44 günlük Vətən müharibəsində qazanılan tarixi Qələbə iki qardaş ölkə arasında strateji əməkdaşlığın daha da möhkəmlənməsində mühüm rol oynayıb. O qeyd edib ki, Türkiyə ilə Azərbaycan arasındakı əlaqələr yalnız təhlükəsizlik sahəsini deyil, enerji, iqtisadiyyat, elm, təhsil və digər istiqamətləri də əhatə edir.Hüsamettin İnanç bildirib ki, Bakı–Tbilisi–Ceyhan neft kəməri, təbii qaz layihələri və digər iri enerji təşəbbüsləri iki ölkə arasındakı strateji tərəfdaşlığın ən mühüm göstəricilərindəndir. Onun sözlərinə görə, bu əməkdaşlıq Ümummilli Lider Heydər Əliyevin irəli sürdüyü “Bir millət, iki dövlət” prinsipinin ən parlaq təzahürüdür.Politoloq əlavə edib ki, Türk Dövlətləri Təşkilatı çərçivəsində əməkdaşlığın genişlənməsi, təhlükəsizlik və müdafiə sahəsində yeni mexanizmlərin formalaşdırılması, eləcə də gələcəkdə birgə hərbi təlimlərin keçirilməsi bu strateji münasibətlərin daha da inkişaf etdiyini göstərir. O, həmçinin Qarabağ Zəfərinin bütün Türk dünyası üçün mühüm nümunə yaratdığını və Türkiyə–Azərbaycan münasibətlərinin digər türk dövlətləri ilə əməkdaşlıq üçün örnək model olduğunu vurğulayıb.
