Elpress.az xəbər verir ki, Azərbaycanın rayon və şəhər icra hakimiyyətlərinin tabeliyində fəaliyyət göstərən üç qurum ləğv edilib.
Məlumata görə, ləğv olunan qurumlar Yaşıllaşdırma və Abadlıq İşləri İdarəsi, Kommunal Təsərrüfat İdarəsi və Mənzil İstismar Sahələridir.
Qeyd olunur ki, bu qurumların bazasında “Mənzil-Kommunal Təsərrüfatı Müəssisəsi” MMC-lər yaradılıb. Yeni müəssisələr də icra hakimiyyətlərinin tabeliyində fəaliyyət göstərəcək.
Bildirilir ki, aparılan dəyişiklik ölkədə həyata keçirilən struktur islahatlarının tərkib hissəsidir.
Ləğvetmə nəticəsində bəzi əməkdaşlar ixtisara salınıb, digərləri isə yeni yaradılan MMC-lərdə işlə təmin olunublar.
Xatırladaq ki, Baş nazir Əli Əsədovun 2025-ci il 22 dekabr tarixli qərarı ilə yerli icra hakimiyyəti başçılarının tabeliyində mənzil-kommunal təsərrüfatı sahəsində fəaliyyət göstərən müəssisələrin işinin təkmilləşdirilməsi istiqamətində yeni qaydalar təsdiqlənib. Bu qərar əsasında “Yerli icra hakimiyyəti başçısının tabeliyində olan Mənzil-Kommunal Təsərrüfatı Müəssisəsinin Nümunəvi Nizamnaməsi” də təsdiq edilib.
