Nazir müavini: Son 7 ildə sosial dəstək tədbirləri əhəmiyyətli nəticələr verib
Elpress.az xəbər verir ki, Son yeddi il ərzində Azərbaycanda həyata keçirilən beş sosial islahat paketi 4 milyon vətəndaşı əhatə edib.Bu barədə əmək və əhalinin sosial müdafiəsi nazirinin müavini Hidayət Abdullayev 4-cü Beynəlxalq Minatəmizləmə Konfransında keçirilən panel sessiyada məlumat verib.Onun sözlərinə görə, sosial islahatlar, o cümlədən mina qurbanları və onların ailələri üçün sosial müdafiə sisteminin əhəmiyyətli dərəcədə gücləndirilməsinə imkan yaradıb. Dövlət tərəfindən mənzil, mobillik və təhsil sahələrində də genişmiqyaslı dəstək tədbirləri həyata keçirilib.Bildirilib ki, əlilliyi olan şəxslərə və müvafiq kateqoriyalara aid digər şəxslərə 16 mindən çox mənzil təqdim olunub. Mənzillərin 7 300-ü Vətən müharibəsindən sonra verilib. Bundan əlavə, müharibə ilə əlaqədar əlilliyi olan 7 700 şəxs dövlət hesabına avtomobillə təmin edilib.Hidayət Abdullayev Azərbaycanın müasir və əlçatan reabilitasiya sisteminin qurulması istiqamətində də əhəmiyyətli irəliləyiş əldə etdiyini bildirib. Hazırda protez-ortopedik istehsal və reabilitasiya mərkəzləri ilə birlikdə 15 reabilitasiya müəssisəsində stasionar, ambulator, icma əsaslı, səyyar və onlayn formatlarda tibbi, sosial və psixoloji reabilitasiya xidmətləri göstərilir.Nazir müavini qeyd edib ki, Vətən müharibəsi başa çatdıqdan sonra müharibə ilə əlaqədar əlilliyi olan 3 800-dən çox şəxs reabilitasiya və psixoloji dəstək alıb. 2 500-dən çox şəxsə 100 mindən artıq reabilitasiya vasitəsi təqdim edilib. Əzalarını itirmiş 500-dən çox hərbi qulluqçu isə 624 müasir protezlə təmin olunub.Onun sözlərinə görə, avqustun 1-nə olan məlumata əsasən, müharibədən sonrakı sosial dəstək paketi çərçivəsində 435 min xidmət göstərilib və tədbirlər 132 min şəxsi əhatə edib.Bundan başqa, Ümumdünya Səhiyyə Təşkilatı ilə əməkdaşlıq nəticəsində dövlət tərəfindən maliyyələşdirilən reabilitasiya vasitələrinin çeşidi təxminən dörd dəfə genişləndirilib. Belə ki, onların sayı 34-dən 130-a çatdırılıb.
