Azərbaycan Xarici İşlər Nazirliyi Fransanın Avropa və xarici işlər naziri Jan-Noel Baronun ölkəmizlə bağlı səsləndirdiyi fikirləri əsassız hesab edərək qınayıb.
Elpress.az xəbər verir ki, XİN-in mətbuat katibi Ayxan Hacızadə rəsmi Bakının oktyabrın 13-də İqtisadi Əməkdaşlıq və İnkişaf Təşkilatının (İƏİT) “Etimadın qurulması və demokratiyanın möhkəmləndirilməsi üzrə Qlobal Forum”unda Fransa nazirinin çıxışına münasibətini açıqlayıb.
Hacızadənin sözlərinə görə, Azərbaycanı Yeni Kaledoniya və Fransanın digər dənizaşırı ərazilərində yaşayan xalqların hüquqları uğrunda mübarizəsinə müdaxilə etməkdə ittihamlandırmaq əsassızdır. O bildirib ki, həmin ərazilərdəki proseslərə fərqli yanaşmaları xarici müdaxilə ilə əlaqələndirmək yerli əhalinin iradə və narahatlıqlarını kölgədə qoyur.
XİN rəsmisi Fransa tərəfinin demokratiya, insan hüquqları və hüququn aliliyi prinsiplərini ilk növbədə öz siyasətində ardıcıl tətbiq etməsinin vacibliyini vurğulayıb.
Azərbaycan Fransanı ölkəmizlə bağlı əsassız iddialara son qoymağa, qarşılıqlı hörmət, suveren bərabərlik və daxili işlərə qarışmamaq prinsiplərinə əməl etməyə çağırıb.
