Yunis Qurbanov Azərbaycan–ABŞ münasibətlərinin strateji səviyyədə inkişaf etdiyini bildirib
Elpress.az xəbər verir ki , Politoloq Yunis Qurbanov hesab edir ki, son dövrlər Azərbaycan ilə ABŞ arasında müşahidə olunan diplomatik fəallıq iki ölkə arasındakı münasibətlərin keyfiyyətcə yeni strateji mərhələyə keçdiyini göstərir. Onun sözlərinə görə, münasibətlər artıq qarşılıqlı hörmət, praqmatik əməkdaşlıq və milli maraqların nəzərə alınması prinsipləri əsasında inkişaf edir.Ekspert bildirib ki, Prezident İlham Əliyevin ABŞ Prezidenti Donald Trampın dəvəti ilə Vaşinqtona etdiyi səfər ikitərəfli əlaqələrdə mühüm dönüş nöqtəsi olub. O qeyd edib ki, həmin görüş zamanı Strateji Tərəfdaşlıq Xartiyasının hazırlanması üçün Strateji İşçi Qrupunun yaradılması barədə Anlaşma Memorandumu imzalanıb və bu sənəd gələcək əməkdaşlığın əsas istiqamətlərini müəyyənləşdirib.Yunis Qurbanovun sözlərinə görə, sonrakı mərhələdə ABŞ-nin vitse-prezidenti Cey Di Vensin Azərbaycana səfəri zamanı Strateji Tərəfdaşlıq haqqında Xartiyanın imzalanması münasibətlərin strateji səviyyəyə yüksəlməsinin hüquqi və siyasi əsasını formalaşdırıb. Politoloq vurğulayıb ki, Azərbaycan bu əməkdaşlıqda bərabərhüquqlu tərəfdaş kimi çıxış edir və müstəqil xarici siyasət yürüdərək milli maraqlarını qətiyyətlə müdafiə edir.Ekspert həmçinin ABŞ-nin Azadlığa Dəstək Aktına edilmiş 907-ci düzəliş barədə danışaraq bildirib ki, bu qərar qəbul edildiyi dövrdən etibarən ədalətsiz və siyasi xarakter daşıyıb. Onun fikrincə, hazırkı geosiyasi şəraitdə həmin düzəliş öz aktuallığını itirib və Azərbaycan–ABŞ strateji tərəfdaşlığının daha da inkişafı üçün qarşılıqlı hörmət, etimad və bərabərhüquqlu əməkdaşlıq prinsipləri əsas rol oynamalıdır.
