Azərbaycanın xarici işlər naziri Ceyhun Bayramov ilə Rumıniya Prezidentinin milli təhlükəsizlik üzrə müşaviri Marius-Qabriel Lazurka arasında ikitərəfli əməkdaşlığın mövcud vəziyyəti və perspektivləri müzakirə olunub.
18 iyun tarixində Azərbaycan Respublikasının xarici işlər naziri Ceyhun Bayramov Rumıniya Prezidentinin milli təhlükəsizlik üzrə müşaviri Marius-Qabriel Lazurka ilə görüş keçirib. Görüşdə Azərbaycan ilə Rumıniya arasında strateji tərəfdaşlıq münasibətlərinin hazırkı vəziyyəti və gələcək inkişaf istiqamətləri ətrafında geniş fikir mübadiləsi aparılıb.Tərəflər son illərdə həyata keçirilən yüksək səviyyəli səfərlərin və intensiv siyasi dialoqun iki ölkə arasında münasibətlərin daha da dərinləşməsinə mühüm töhfə verdiyini qeyd ediblər. Həmçinin ticarət-iqtisadi əlaqələr və elmi-texniki əməkdaşlıq üzrə Müştərək Komissiyanın fəaliyyəti ikitərəfli əməkdaşlığın genişləndirilməsində vacib platforma kimi qiymətləndirilib.Görüşdə enerji sahəsi Azərbaycan–Rumıniya münasibətlərinin əsas istiqamətlərindən biri kimi xüsusi vurğulanıb. Bununla yanaşı, yaşıl enerji və alternativ enerji mənbələri üzrə əməkdaşlığın genişləndirilməsi imkanları müzakirə olunub. Nəqliyyat, kommunikasiya, təhsil və əczaçılıq kimi sahələrdə əməkdaşlığın gücləndirilməsi, eləcə də qarşılıqlı investisiyaların təşviqi məsələləri diqqət mərkəzində olub.Nazir Ceyhun Bayramov Azərbaycanın əlverişli investisiya mühiti və regionda artan iqtisadi imkanları barədə məlumat verib. O, xüsusilə Ələt Azad İqtisadi Zonasında yaradılan şəraitin xarici investorlar üçün mühüm imkanlar açdığını vurğulayıb.Tərəflər həmçinin beynəlxalq təşkilatlar çərçivəsində, o cümlədən Avropa İttifaqı ilə əməkdaşlığın inkişaf etdirilməsinin vacibliyini qeyd ediblər və regional məsələlər ətrafında fikir mübadiləsi aparıblar.
