İlham Əliyev “John Deere” şirkəti ilə kənd təsərrüfatı sahəsində əməkdaşlığın inkişaf perspektivlərini müzakirə edib
Elpress.az xəbər verir ki, Azərbaycan Prezidenti İlham Əliyev iyulun 16-da “John Deere” şirkətinin MDB və Mərkəzi Asiya ölkələri üzrə prezidenti, “John Deere Walldorf International” MMC-nin Baş icraçı direktoru Çaba Leyko və şirkətin MDB üzrə vitse-prezidenti Peter Zakseni qəbul edib.Prezidentin Mətbuat Xidmətinin yaydığı məlumata görə, görüş zamanı dövlət başçısı ilə Çaba Leyko arasında ötən il Bakıda keçirilmiş görüş məmnunluqla xatırlanıb. Qonaqlar Azərbaycanda müşahidə etdikləri inkişafın onlarda xoş təəssürat yaratdığını vurğulayıblar.Çaba Leyko rəhbərlik etdiyi şirkətin Azərbaycanda uğurlu fəaliyyət göstərdiyini qeyd edərək, ölkə ilə əməkdaşlığın daha da genişləndirilməsində maraqlı olduqlarını bildirib.Görüşdə Azərbaycanın kənd təsərrüfatı sahəsində böyük potensiala malik olduğu, bu istiqamətdə müasir texnologiyaların tətbiq edildiyi və dövlət səviyyəsində həyata keçirilən islahatların əhəmiyyəti xüsusi vurğulanıb. Həmçinin kənd təsərrüfatının inkişafına dair yeni Dövlət Proqramının bu sahənin daha da inkişafına töhfə verəcəyi qeyd edilib.Tərəflər Azərbaycan ilə “John Deere” arasında əməkdaşlığın gələcək perspektivlərini müzakirə edib, kənd təsərrüfatının müxtəlif istiqamətləri üzrə əlaqələrin genişləndirilməsi üçün əlverişli imkanların mövcud olduğunu bildiriblər.
