Bakıda 2-3 iyun tarixlərində Azərbaycan və Avropa İttifaqı nümayəndələri yeni hərtərəfli saziş layihəsi və 2026-2030-cu illər üçün nəzərdə tutulan Tərəfdaşlıq Prioritetləri sənədi üzrə danışıqlar aparıblar.
Elpress.az-ın Apa.az-a istinadən verdiyi məlumata əsasən, Azərbaycan nümayəndə heyətinə xarici işlər nazirinin müavini Yalçın Rəfiyev, Avropa İttifaqı tərəfinə isə Audrone Perkauskiene rəhbərlik edib.Səmərəli və konstruktiv atmosferdə keçən danışıqlar nəticəsində 2026–2030-cu illəri əhatə edən Avropa İttifaqı–Azərbaycan Tərəfdaşlıq Prioritetləri sənədinin layihəsi üzrə ilkin razılıq əldə olunub. Bu, tərəflər arasında əməkdaşlığın gələcək istiqamətlərinin müəyyənləşdirilməsi baxımından mühüm addım kimi qiymətləndirilir.Yeni hərtərəfli saziş layihəsi ətrafında aparılan müzakirələr zamanı Azərbaycan Respublikasının müxtəlif dövlət qurumlarını təmsil edən nümayəndələr Avropa İttifaqından olan həmkarları ilə sənədin ayrı-ayrı bölmələri üzrə geniş fikir mübadiləsi aparıblar. Görüşlər çərçivəsində bir sıra vacib sahələr üzrə irəliləyiş qeydə alınıb, həmçinin danışıqlar prosesinin növbəti mərhələlərinə dair konkret fəaliyyət istiqamətləri müəyyənləşdirilib.Danışıqların yekununda tərəflər yeni ikitərəfli saziş layihəsi üzrə müzakirələrin həm onlayn, həm də üzbəüz görüşlər formatında intensiv şəkildə davam etdirilməsi barədə ortaq razılığa gəliblər.Xarici İşlər Nazirliyi ilə yanaşı, Azərbaycan nümayəndə heyətində Azərbaycan Respublikası Prezident Administrasiyası, İqtisadiyyat Nazirliyi, Ədliyyə Nazirliyi, Energetika Nazirliyi, Rəqəmsal İnkişaf və Nəqliyyat Nazirliyi, Maliyyə Nazirliyi, Əmək və Əhalinin Sosial Müdafiəsi Nazirliyi, Elm və Təhsil Nazirliyi, eləcə də Mərkəzi Bank, Dövlət Gömrük Komitəsi, SOCAR, Antiinhisar və İstehlak Bazarına Nəzarət Dövlət Agentliyi, Əqli Mülkiyyət Agentliyi və Medianın İnkişafı Agentliyinin nümayəndələri də təmsil olunublar. Bu geniş tərkibli iştirak danışıqların müxtəlif sahələri əhatə etdiyini və tərəflər arasında əməkdaşlığın daha da dərinləşdirilməsinə verilən önəmi nümayiş etdirib.
