Elpress.az APA-Economics-ə istinadən xəbər verir ki, iyulun 1-2-də Bakıda Azərbaycanın sədrliyi ilə Qara Dəniz Ticarət və İnkişaf Bankının Rəhbərlər Şurasının 28-ci İllik Toplantısı və Biznes Forumu keçiriləcək.
İllik Toplantı çərçivəsində Bankın ötən dövr üzrə fəaliyyəti qiymətləndiriləcək, 2025-ci ilə dair maliyyə hesabatları təsdiqlənəcək, həmçinin qurumun gələcək inkişaf strategiyası və institusional fəaliyyət istiqamətləri müzakirə olunacaq.Tədbir çərçivəsində təşkil olunacaq Biznes Forum isə “Bazarların əlaqələndirilməsi, iqtisadiyyatların şaxələndirilməsi: Azərbaycan regional qovşaq kimi” mövzusuna həsr ediləcək. Forumda Azərbaycanın iqtisadi inkişaf prioritetləri, regional əməkdaşlıq imkanları, ölkədə həyata keçirilən investisiya layihələri və inkişafın maliyyələşdirilməsi sahəsində mövcud çağırışlar ətrafında fikir mübadiləsi aparılacaq.Müzakirələr zamanı Azərbaycanın Avropa və Asiya arasında mühüm iqtisadi, nəqliyyat və logistika mərkəzi kimi rolu, regional bağlantıların genişləndirilməsi və dayanıqlı iqtisadi artımın təmin edilməsində şaxələndirilmiş maliyyə mexanizmlərinin əhəmiyyəti diqqət mərkəzində olacaq.Forum çərçivəsində plenar sessiyaların, təqdimatların və işgüzar görüşlərin keçirilməsi, eləcə də sahibkarlar və maliyyə institutlarının nümayəndələri arasında ikitərəfli (B2B) görüşlərin təşkili nəzərdə tutulur.Qeyd edək ki, baş qərargahı Saloniki şəhərində yerləşən Qara Dəniz Ticarət və İnkişaf Bankı Qara Dəniz İqtisadi Əməkdaşlıq Təşkilatına üzv olan 11 dövlət tərəfindən yaradılıb. Bank üzv ölkələrdə davamlı iqtisadi inkişafın və regional əməkdaşlığın təşviqi, dövlət və özəl sektor layihələrinin maliyyələşdirilməsi, investisiyaların və ticarətin dəstəklənməsi istiqamətində fəaliyyət göstərir.
