72 yaşlı aktyorun illərə meydan oxuyan gənc görünüşü sosial şəbəkələrdə geniş müzakirələrə səbəb olub.
Elpress.az-ın qafqazinfo.az-a istinadən verdiyi məlumata əsasən, John Travolta Fransada keçirilən Cannes Film Festival çərçivəsində həm yeni imici, həm də aldığı xüsusi mükafatla diqqət mərkəzinə düşüb.72 yaşlı Hollivud ulduzu festivalın qırmızı xalçasına qızı Ella Bleu Travolta ilə birlikdə çıxaraq gənc görünüşü və yenilənmiş tərzi ilə iştirakçıların marağına səbəb olub. Gecənin ən yaddaqalan anı isə Travoltanın rejissor kimi ərsəyə gətirdiyi ilk ekran işi olan “Propeller One-Way Night Coach” filminin premyerasında yaşanıb. Belə ki, səhnəyə dəvət olunan aktyora sürpriz şəkildə fəxri “Qızıl Palma Budağı” mükafatı təqdim edilib.Qeyd edək ki, “Pulp Fiction”, “Grease” və “Saturday Night Fever” kimi məşhur filmlərlə tanınan aktyorun yeni layihəsi aviasiyanın “qızıl dövrü”nə həsr olunub. Ailəvi macəra janrında çəkilən ekran işi Travoltanın 1997-ci ildə qələmə aldığı uşaq kitabı əsasında hazırlanıb. Layihədə aktyor həm ssenari müəllifi, həm rejissor, həm prodüser, həm də aktyor kimi yer alıb. Filmdə onun qızı Ella Blö Travolta da rol alıb. Ekran işinin ayın sonunda tv.apple.com platformasında yayımlanacağı bildirilib.Xatırladaq ki, builki fəxri “Qızıl Palma Budağı” mükafatının Peter Jackson və Barbra Streisand kimi tanınmış simalara da təqdim olunacağı qeyd edilib.
