Beynəlxalq tədbirdə Qarabağın dini irsi və işğaldan azad edilmiş ərazilərdə aparılan bərpa işləri müzakirə olunub
Elpress.az xəbər verir ki, Ağdam şəhərində Türk Dövlətləri Təşkilatının Müsəlman Dini İdarə Rəhbərləri Şurasının 7-ci görüşü çərçivəsində görkəmli Azərbaycan alimi, ilahiyyatçı-filosof Şeyx Seyyid Yəhya Bakuvi Şirvaniyə həsr olunmuş beynəlxalq elmi-praktiki konfrans təşkil edilib.Tədbir Dövlət Himninin səsləndirilməsi ilə başlayıb. Konfransda çıxış edən Qafqaz Müsəlmanları İdarəsinin sədri, şeyxülislam Allahşükür Paşazadə işğal dövründə Qarabağda 67-dən çox məscid və dini məbədin dağıdıldığını bildirib. O, Ağdam Cümə məscidinin də vandalizmə məruz qaldığını diqqətə çatdırıb.Prezidentin Ağdam, Füzuli və Xocavənd rayonlarındakı xüsusi nümayəndəsi Emin Hüseynov isə Ağdamda həyata keçirilən bərpa və quruculuq layihələrindən danışıb.Çıxışlarda regionda sülh və sabitliyin qorunmasının, eləcə də işğaldan azad edilmiş ərazilərdə dini və mədəni irsin bərpasının əhəmiyyəti vurğulanıb.Konfransın ardından iştirakçılar Ağdam Cümə məscidində namaz qılıb, daha sonra Şəhidlər xiyabanını ziyarət ediblər. Tədbir iştirakçılarının günün ikinci yarısında Xocalı və Şuşaya səfər etməsi planlaşdırılır.
