Azərbaycan Baş Prokurorluğu Türkiyə vətəndaşı, “Şanlıurfa Olay” qəzetinin köşə yazarı Celal Çiftci barəsində cinayət işi başlayıb. O, beynəlxalq axtarışa verilib və barəsində qiyabi həbs qətimkan tədbiri seçilib.
Elpress.az xəbər verir ki, Baş Prokurorluğun yaydığı məlumata görə, sosial şəbəkələrdə Çiftci tərəfindən Azərbaycanda hakimiyyətin zorla ələ keçirilməsinə, konstitusiya quruluşunun dəyişdirilməsinə, eləcə də zorakılıq yolu ilə dini nifrət və düşmənçiliyin yayılmasına yönələn materialların paylaşılması ilə bağlı araşdırma aparılıb.
İstintaq zamanı dini radikalizm məzmunlu materialların, o cümlədən süni intellekt vasitəsilə hazırlanmış paylaşımların təkrar yayıldığı və müxtəlif başlıqlar altında çağırışların edildiyi müəyyən olunub.
Toplanmış materiallar əsasında 16 oktyabr 2026-cı il tarixində Cinayət Məcəlləsinin 281.2, 283.2.1 və 167-3.1-ci maddələri ilə cinayət işi başlanıb. İbtidai istintaqın aparılması Baş Prokurorluğun İstintaq İdarəsinə həvalə edilib.
Celal Çiftci cinayət işi üzrə təqsirləndirilən şəxs qismində cəlb olunub. Onun və digər şəxslərin barəsində zəruri istintaq hərəkətlərinin aparılması üçün Türkiyənin səlahiyyətli orqanlarına beynəlxalq hüquqi yardım sorğuları göndərilib.
Hazırda materialların hazırlanması və yayılması halları, eləcə də iş üçün əhəmiyyətli digər məqamlar araşdırılır. Baş Prokurorluq dini zəmində nifrət və düşmənçiliyi təşviq edən məzmunun yayılmamasına, sosial şəbəkələrdən məsuliyyətlə istifadəyə çağırıb.
