Azərbaycan bəstəkarı Qara Qarayevin yaradıcılığı İsveçdə gənc musiqiçilərə təqdim olunacaq. Onun “Yeddi gözəl” baletindən “Adajio” əsərinin fortepiano və skripka üçün işlənmiş versiyası Katrineholm musiqi məktəbinin tədris proqramına daxil edilib.
Elpress.az xəbər verir ki, bu təşəbbüs İsveçdə yaşayan azərbaycanlı pianoçu Aynur Məlikovanın səyi nəticəsində reallaşıb. O, Azərbaycan klassik musiqisini xarici auditoriyaya tanıtmaq məqsədilə əsərin notlarını və rəqəmsal variantını məktəbin nümayəndələrinə göndərib.
Məlikovanın sözlərinə görə, musiqi məktəbinin rektoru Hanna Moen və skripka müəllimi Sara Karlsson əsəri dinlədikdən sonra onun emosional dərinliyini və təsir gücünü yüksək qiymətləndiriblər.
Qeyd edək ki, bu, Azərbaycan bəstəkarlarının əsərləri arasında İsveçdə musiqi tədrisinə daxil edilən ikinci nümunədir. Daha əvvəl Arif Məlikovun “Komdenin arzuları” əsəri Lidinqö musiqi məktəbinin repertuarına salınıb.
