İsveçli rejissor Mikael Silkeberq Qərbi Azərbaycanın zəngin mədəni irsindən bəhs edən “Yaddaşda Yaşayan Vətən” adlı sənədli film ərsəyə gətirib. Azərbaycanın İsveçdəki səfirliyinin təşkilati dəstəyi ilə hazırlanan 55 dəqiqəlik film Skandinaviyadan Azərbaycana uzanan tarixi-mədəni səyahəti əks etdirir.
Sənədli ekran əsərində yaddaşın coğrafi sərhədləri aşaraq xalqın kimliyini, adət-ənənələrini və mədəni irsini necə yaşatdığı araşdırılır. Film İsveçdə yerləşən Uppsala Universiteti Kitabxanasından başlayır. Burada rejissor Azərbaycan dili ilə bağlı nadir tarixi əlyazmalardan birini araşdıraraq mədəni irsin əsrlər boyu qorunub saxlanılmasının önəmini göstərir.Filmdə həmçinin Skandinaviya ilə Azərbaycan arasında tarixi əlaqələrə toxunulur, XIX əsrdə regiona maraq göstərən Avropa nümayəndələrinin qeydləri və Azərbaycanla bağlı tarixi izlər təqdim olunur.“Yaddaşda Yaşayan Vətən”in əsas xətti Qərbi Azərbaycanın yaddaşda qorunan mədəni məkan kimi təqdim edilməsidir. Ekran əsərində arxiv materialları, şahid fikirləri, musiqi, ədəbiyyat, təsviri sənət, xalçaçılıq, milli geyimlər və kulinariya nümunələri vasitəsilə bu irsin nəsildən-nəslə ötürüldüyü vurğulanır.Filmdə xüsusi yer tutan mövzulardan biri aşıq sənətidir. Göyçə mahalında doğulan Aşıq Ələsgərin yaradıcılığı, saz, balaban, zurna və yallı kimi milli mədəniyyət nümunələri vasitəsilə yaddaşın canlı şəkildə qorunduğu göstərilir.Azərbaycanın İsveçdəki səfiri Zaur Əhmədov bildirib ki, film məkanların, ənənələrin və mənəvi dəyərlərin yaddaş vasitəsilə yaşamasını araşdırır. Onun sözlərinə görə, ekran əsəri arxiv tapıntılarını, ədəbiyyatı, musiqini, sənəti və insan hekayələrini vahid bir bədii xəttdə birləşdirir.“Yaddaşda Yaşayan Vətən” filmi artıq Bakıda təqdim olunub. Ekran əsərinin təqdimatı Azərbaycan Dövlət Pedaqoji Universitetidə keçirilib və tədbir universitetin Qərbi Azərbaycan Araşdırmalar Mərkəzinin təşkilatçılığı ilə baş tutub.
