2 Avqust – Azərbaycan Kinosu Günü münasibətilə Daşkəsən rayonunda ilk dəfə açıq hava şəraitində milli kino nümayişi təşkil edilib.
Elpress.az xəbər verir ki, tədbir “AzerGold” QSC və Bakı Media Mərkəzinin birgə təşkilatçılığı, Daşkəsən Rayon İcra Hakimiyyətinin dəstəyi ilə baş tutub.Tədbir çərçivəsində Bakı Media Mərkəzinin istehsalı olan “Tağıyev: Neft” tammetrajlı bədii filmi nümayiş etdirilib. Tarixi bioqrafik dram janrında çəkilən ekran əsərinin baş prodüseri Arzu Əliyeva, rejissoru isə Zaur Qasımlıdır.Film Azərbaycanın tanınmış xeyriyyəçisi və sahibkarı Hacı Zeynalabdin Tağıyevin həyat və fəaliyyətinə həsr olunmuş dördhissəli layihənin ilk hissəsidir.
Ekran əsərində Tağıyevin neft sənayesindəki fəaliyyəti və ölkənin inkişafına verdiyi töhfələr bədii şəkildə əks olunub.Daşkəsən rayonunun Xoşbulaq kəndində yerləşən Gənclərin Təlim və İstirahət Mərkəzində xüsusi qurulan açıq hava kinoteatrında keçirilən nümayişi 600-dən çox tamaşaçı izləyib.
Qeyd edək ki, “Tağıyev: Neft” filmi Azərbaycanın 98-ci “Oskar” mükafatlarının “Ən yaxşı beynəlxalq tammetrajlı film” nominasiyası üzrə rəsmi namizədi kimi irəli sürülüb.
