Bu gün Azərbaycan milli mətbuatının yaranmasının 151-ci ildönümü qeyd olunur. 1875-ci il iyulun 22-də Həsən bəy Zərdabinin nəşr etdirdiyi “Əkinçi” qəzeti ilə əsası qoyulan milli mətbuatımız ötən əsrlər ərzində ölkənin ictimai-siyasi, mədəni və mənəvi həyatında mühüm rol oynayıb.
Elpress.az xəbər verir ki, müstəqillik illərində Azərbaycan mediasının inkişafı dövlət siyasətinin əsas istiqamətlərindən birinə çevrilib. Söz və mətbuat azadlığının təmin olunması, jurnalistlərin fəaliyyətinin dəstəklənməsi, media mühitinin müasir tələblərə uyğunlaşdırılması istiqamətində ardıcıl addımlar atılıb.
Prezident İlham Əliyevin 12 yanvar 2021-ci il tarixli Fərmanı ilə media sahəsində islahatların yeni mərhələsinə start verilib. Həmin sənədə əsasən, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun bazasında Medianın İnkişafı Agentliyi (MEDİA) yaradılıb.
Bu gün Azərbaycan mediası rəqəmsal transformasiya dövrünə uyğun inkişaf edərək cəmiyyətin operativ və obyektiv məlumatlandırılması, milli maraqların qorunması və informasiya təhlükəsizliyinin təmin olunması istiqamətində fəaliyyətini davam etdirir.
151 illik şərəfli yol keçən Azərbaycan mətbuatı bundan sonra da peşəkarlıq, məsuliyyət və milli dəyərlərə sadiqlik prinsiplərinə əsaslanaraq ölkənin inkişafına töhfə verməyə davam edəcək.
