İçərişəhərdə “Qarabağın mədəniyyət xəritəsi – hər rayonun səsi” adlı genişmiqyaslı festivalın açılış mərasimi keçirilib.
Elpress.az-ın Trend.az-a istinadən verdiyi məlumata əsasən, Mədəniyyət Nazirliyinin maliyyə dəstəyi, “İçərişəhər” Dövlət Tarix-Memarlıq Qoruğu İdarəsi və “Qeyd-İctimai Maarif” İctimai Birliyinin birgə təşkilatçılığı ilə baş tutan festivalın əsas məqsədi Qarabağın zəngin mədəni irsini tanıtmaq, milli-mənəvi dəyərləri təbliğ etmək və bölgənin mədəni potensialını geniş ictimaiyyətə təqdim etmək olub. Tədbir çərçivəsində Qarabağa həsr olunmuş sərgi, canlı musiqi proqramları, ənənəvi sənətkarlıq nümunələri, milli mətbəx təqdimatları və ustad dərsləri keçirilib. Rəsmi açılış mərasimində çıxış edən “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud Qarabağın Azərbaycanın milli yaddaşında xüsusi yer tutduğunu vurğulayaraq, bu cür festivalların mədəni irsin qorunması və gələcək nəsillərə ötürülməsi baxımından böyük əhəmiyyət daşıdığını bildirib. “Qeyd-İctimai Maarifləndirmə” İctimai Birliyinin baş katibi Aysel Tahirova isə festivalın əsas ideyasının Qarabağın hər bir bölgəsini özünəməxsus səsi, sənətkarlığı və mədəni kimliyi ilə təqdim etmək olduğunu qeyd edib. Onun sözlərinə görə, məqsəd Qarabağın zəngin mədəni xəritəsini vahid platformada nümayiş etdirmək və bu dəyərləri gələcək nəsillərə çatdırmaqdır. Festival bədii proqram və konsertlərlə davam edib. İştirakçılar Qarabağın müxtəlif bölgələrinə aid mədəniyyət nümunələri, milli musiqi və sənətkarlıq ənənələri ilə yaxından tanış olublar.
