Nizami Gəncəvi adına Milli Azərbaycan Ədəbiyyatı Muzeyində 8 Noyabr – Zəfər Günü münasibətilə “Zəfərli bayrağımız” mövzusunda elmi sessiya təşkil olunub.
Elpress.az xəbər verir ki, tədbirdə muzeyin direktoru, akademik Rafael Hüseynov “Bütün gələcək zəfərlərə müqəddimə” mövzusunda məruzə ilə çıxış edib.
Akademik çıxışında 44 günlük Vətən müharibəsində qazanılan Qələbənin tarixi əsaslarından, milli birlik və dövlətçilik ənənələrinin bu uğurdakı rolundan danışıb. O, tarixi Zəfərin təməlinin Ümummilli Lider Heydər Əliyevin ordu quruculuğu və dövlətçilik strategiyası ilə qoyulduğunu, bu siyasi kursun Prezident İlham Əliyev tərəfindən davam etdirildiyini vurğulayıb.
Rafael Hüseynov Şuşanın 2020-ci il noyabrın 8-də azad edilməsini Azərbaycan tarixində yeni mərhələnin başlanğıcı kimi dəyərləndirib. O, 2023-cü ilin sentyabrında keçirilən antiterror tədbirləri nəticəsində ölkənin suverenliyinin bütün ərazidə bərpa olunmasının tarixi Qələbəni tamamladığını bildirib.
Məruzədə Azərbaycanın beynəlxalq müstəvidə apardığı mübarizəyə də toxunulub. Akademik 2005-ci ildə Avropa Şurası Parlament Assambleyasının qəbul etdiyi 1416 saylı qətnamənin ölkəmizin mövqeyinin beynəlxalq ictimaiyyətə çatdırılması baxımından əhəmiyyətini qeyd edib.
Tədbirdə Zəfər Günü ilə Dövlət Bayrağı Günü arasındakı tarixi və mənəvi bağlılıq da diqqətə çatdırılıb. Bildirilib ki, Şuşada və Xankəndidə üçrəngli bayrağımızın ucaldılması Azərbaycanın ərazi bütövlüyü və suverenliyinin rəmzinə çevrilib.
Akademik çıxışının sonunda milli birliyin və dövlət müstəqilliyinin qorunmasının vacibliyini vurğulayaraq Məhəmməd Əmin Rəsulzadənin “Bir kərə yüksələn bayraq bir daha enməz!” fikrini xatırladıb.
