İndoneziyanın milli yeməkləri, mədəni irsi və kulinariya ənənələri Bakıda keçirilən festivalda nümayiş etdirilib.
Elpress.az xəbər verir ki, oktyabrın 16-da İndoneziyanın Bakıdakı səfirliyi və “Gekrafs Azerbaijan” nümayəndəliyinin birgə təşkilatçılığı ilə “İndoneziya kulinariya diplomatiyası festivalı 2026” baş tutub.
Tədbirin məqsədi iki ölkə arasında mədəni əlaqələri genişləndirmək, İndoneziyanın milli kimliyini və kreativ iqtisadiyyat imkanlarını tanıtmaq olub. Festival, həmçinin Azərbaycanda yaşayan indoneziyalı sahibkarlara öz kulinariya məhsullarını təqdim etmək və satış imkanlarını artırmaq üçün şərait yaradıb.
İndoneziyanın Azərbaycandakı səfiri Berlian Helmi təşəbbüsün mədəni diplomatiyanın inkişafına xidmət etdiyini bildirib. O, milli mətbəxin və kreativ iqtisadiyyatın Azərbaycanla ikitərəfli münasibətlərin möhkəmlənməsində əhəmiyyətini vurğulayıb.
Festival iştirakçıları ənənəvi İndoneziya yeməkləri ilə tanış olub, kulinariya nümayişlərini izləyib və ölkənin mədəniyyətini əks etdirən proqramlara qatılıblar.
