Qəsrin tarixini və Abşeronun orta əsr müdafiə sistemini əks etdirən ekspozisiyada rəqəmsal texnologiyalardan istifadə olunub
Elpress.az xəbər verir ki, Azərbaycanın dünya əhəmiyyətli tarixi-memarlıq abidələrindən biri olan Ramana qəsrində yeni konsepsiya əsasında muzey fəaliyyətə başlayıb.“Tarixə açılan pəncərə” konsepsiyası ilə hazırlanan ekspozisiyada qəsrin tarixi və memarlıq xüsusiyyətləri müasir muzey yanaşmaları və rəqəmsal texnologiyalar vasitəsilə təqdim olunur. Layihə hazırlanarkən tarixi abidənin autentikliyinin qorunmasına xüsusi diqqət yetirilib.Muzeyin ekspozisiyası Ramana qəsrinin tarixi, Abşeronun orta əsrlərdəki müdafiə sistemi, hərb sənəti, gündəlik həyat və mədəniyyət haqqında məlumatların təqdim edilməsi üzərində qurulub. Burada 2024–2026-cı illərdə aparılan arxeoloji qazıntılar zamanı aşkarlanmış maddi-mədəniyyət nümunələri də nümayiş etdirilir.Ekspozisiyada “Seyri-Tarix”, “Seyri-Silah”, “Seyri-Tərz” və “Seyri-Həyat” bölmələri yaradılıb. Bu bölmələrdə orta əsr müdafiə sistemi, silahlar, məişət və sənətkarlıq nümunələri, eləcə də feodal-cəngavərin həyat yolu haqqında məlumatlar təqdim olunur.Qəsrin müxtəlif tarixi dövrlərdəki görünüşünü əks etdirən rekonstruksiya maketləri, tarixi fotoşəkillər və arxiv materialları da muzeydə yer alıb.Ziyarətçilər üçün interaktiv ekranlar, elektron məlumat panelləri, immersiv instalyasiya, animasiya, videoproyeksiya və videomapinq kimi texnologiyalardan istifadə edilib. Muzeydə məlumatlar Azərbaycan və ingilis dillərində təqdim olunur.Qəsrin dam terrası panoramik müşahidə meydançası kimi ziyarətçilərin istifadəsinə verilib. Burada “Alov” heykəltəraşlıq kompozisiyası yerləşdirilib. Abidənin ətrafındakı giriş meydançası və piyada marşrutları yenilənib, həmçinin açıq hava ekspozisiyası yaradılıb.Muzeyin daxili və xarici işıqlandırma sistemi İtaliyanın “Linea Light Group” şirkəti ilə əməkdaşlıq çərçivəsində hazırlanıb.Yeni muzey Ramana qəsrinin və ümumilikdə Azərbaycanın qədim tarixinin müasir muzey texnologiyaları vasitəsilə ziyarətçilərə təqdim olunmasına imkan yaradır.
