434 abidəyə dəymiş maddi ziyanın ümumi məbləği 700 milyon 154 min manat qiymətləndirilir
Elpress.az xəbər verir ki, İşğaldan azad edilmiş ərazilərdə yerləşən mədəni irs nümunələrinin inventarlaşdırılması davam etdirilir. Ümumilikdə ərazilərdəki 749 abidədən 575-də inventarlaşdırma işləri aparılıb. Onlardan 196-sı Şuşa şəhərində yerləşir.İnventarlaşdırma zamanı abidələr üzrə çöl tədqiqatları keçirilib, rəqəmsal xəritələr hazırlanıb, foto və dron görüntüləri qeydə alınıb. Həmçinin arxiv sənədləri və digər tarixi mənbələr araşdırılıb.Aparılan monitorinqlər işğal dövründə mədəni irs nümunələrinin ciddi dağıntı və vandalizmə məruz qaldığını göstərib. Məlumata görə, azad edilmiş ərazilərdə 68 abidə tamamilə dağıdılıb, 115 abidə isə genişmiqyaslı dağıntılara məruz qalıb. Digər abidələr müxtəlif dərəcədə zədələnib.Hazırda 434 abidəyə dəymiş ümumi maddi ziyanın 700 milyon 154 min manat olduğu hesablanır.Dövlət qeydiyyatında olan dini-memarlıq abidələri arasında da ciddi dağıntılar qeydə alınıb. Belə ki, 9 türbə, 3 qəbiristanlıq və 7 məscid tamamilə dağıdılıb. Bundan başqa, 25 məscid, 14 türbə və 2 sərdabə müxtəlif dərəcədə zərər görüb.
