Bakıda keçirilən paneldə xarici kapitalın yerli səriştə və texnologiyaların inkişafına təsiri müzakirə edilib
Elpress.az xəbər verir ki, Bakıda II Azərbaycan Beynəlxalq İnvestisiya Forumu çərçivəsində yerli ekspertizanın və qeyri-maddi kapitalın xarici investisiyaların cəlb edilməsində rolu ilə bağlı panel müzakirəsi keçirilib.Tədbirdə SOCAR, AZPROMO, PÖRNER, KPMG Azərbaycan və Caspian Business Hub nümayəndələri iştirak ediblər.Müzakirələr zamanı xarici investisiyaların yalnız ayrı-ayrı layihələrin maliyyələşdirilməsi vasitəsi kimi deyil, yerli kadr və səriştələrin inkişafına, sənaye kooperasiyasının genişlənməsinə və yeni ixrac imkanlarının formalaşmasına xidmət edən mexanizmə çevrilməsi məsələləri diqqətə çatdırılıb.Panel iştirakçıları bildiriblər ki, investisiyanın yaratdığı uzunmüddətli dəyərdə texnologiyaların ötürülməsi, mühəndislik bacarıqlarının inkişafı, yerli təchizat zəncirlərinin qurulması, beynəlxalq standartların tətbiqi və ixrac potensialının artırılması mühüm rol oynayır.TPE şirkətinin icraçı direktoru Rüstəm İsmayılov qeyd edib ki, layihələr zamanı əldə olunan bilik və təcrübənin sistemləşdirilməsi növbəti layihələrin daha səmərəli həyata keçirilməsinə imkan yaradır.SOCAR nümayəndəsi Hikmət Abdullayev isə beynəlxalq tərəfdaşlıq çərçivəsində metodologiya, texnologiya və ekspertizanın yerli mütəxəssislərə ötürülməsinin vacibliyini vurğulayıb. Onun sözlərinə görə, məqsəd xarici tərəfdaşların yalnız işi icra etməsi deyil, əldə olunan biliklərin ölkədə qalmasıdır.Müzakirədə Xəzər regionunda investisiya layihələrinin reallaşdırılması üçün müxtəlif tərəflər arasında koordinasiyanın gücləndirilməsinin əhəmiyyəti də qeyd olunub.Caspian Business Hub-ın rəhbəri Nərmin Cəfərova bildirib ki, əməkdaşlıq infrastrukturunun inkişaf etdirilməsi şirkətlərin mürəkkəb transsərhəd layihələrdə birgə fəaliyyətini asanlaşdıra bilər.Paneldə vurğulanıb ki, investisiyaların qiymətləndirilməsində yalnız cəlb olunan kapitalın həcmi deyil, həmin vəsaitin ölkə daxilində yaratdığı uzunmüddətli iqtisadi dəyər, texnoloji bilik və yerli səriştələrin inkişafına təsiri də nəzərə alınır.
