Azərbaycanda toxumçuluq sahəsində hüquqi tənzimləməni yeniləyən yeni qanun qüvvəyə minib.
Elpress.az xəbər verir ki, Prezident İlham Əliyev “Toxumçuluq haqqında” Azərbaycan Respublikası Qanununun tətbiqi ilə bağlı Fərman imzalayıb.
Yeni qanun toxumların istehsalı, emalı, tədarükü, saxlanması, daşınması və ticarət dövriyyəsi, o cümlədən idxalı və ixracı, sertifikatlaşdırılması və keyfiyyətinə nəzarətlə bağlı münasibətləri tənzimləyir.Qanun 6 fəsil və 27 maddədən ibarətdir. Sənəddə toxumçuluq sahəsində fəaliyyət göstərən şəxslərin və qurumların hüquqi, iqtisadi və təşkilati əsasları müəyyənləşdirilir.
Yeni qaydalara əsasən, seleksiya və toxumçuluq sahəsində xüsusi informasiya sistemi və Reyestr yaradılacaq. Reyestrdə seleksiya nailiyyətləri, qeydiyyata alınmış toxum əməliyyatçıları, bağlanmış müqavilələr və toxumluq əkinlər barədə məlumatlar toplanacaq.
Sistemin elektronlaşdırılması nəticəsində aidiyyəti şəxslər sort və səpin keyfiyyətini təsdiqləyən sertifikata malik toxumlar, eləcə də onların bioloji və iqtisadi göstəriciləri barədə daha ətraflı məlumat əldə edə biləcəklər.
Qanunda toxumçuluq haqqında qanunvericiliyin tələblərinin pozulmasına görə tətbiq edilən cərimələrdən daxil olan vəsaitlə bağlı da xüsusi müddəa yer alıb. Belə ki, həmin cərimələrdən toplanan vəsaitin 50 faizi müvafiq qurumun işçilərinin sosial müdafiəsinin gücləndirilməsi və maddi-texniki bazasının yaxşılaşdırılması məqsədilə həmin qurumun hesabına köçürüləcək.Yeni qanunun qüvvəyə minməsi ilə əlaqədar 1997-ci il 11 mart tarixli “Toxumçuluq haqqında” qanun ləğv edilib.
Bununla yanaşı, yeni qanun qüvvəyə minənədək toxum istehsalçılarına verilmiş şəhadətnamələr həmin sənədlərdə göstərilən müddət ərzində hüquqi qüvvəsini saxlayacaq.
Yeni qanunun əsas məqsədi toxumçuluq sahəsində müasir idarəetmə mexanizmlərinin tətbiqi, məlumatların elektronlaşdırılması, toxumların keyfiyyətinə nəzarətin gücləndirilməsi və bu sahədə fəaliyyətin daha şəffaf şəkildə tənzimlənməsidir.
